நமச்சிவாயத் திருப்பதிகம்

நமச்சிவாயத் திருப்பதிகம்

(திருநாவுக்கரசர் அருளியது)

சொற்றுணை வேதியன் சோதி வானவன்

பொற்றுணைத் திருந்தடி பொருதக் கைந்தொழுக்

கற்றுணைப் பூட்டியோர் கடலிற் பாய்ச்சினும்

நற்றுணையாவது நமச்சிவாயவே. ---------(1)

பூவினுக் கருங்கலம் பொங்கு தாமரை

ஆவினுக் கருங்கலம் அரன் அஞ்சாடுதல்

கோவினுக் கருங்கலம் கோட்டமில்லது

நாவினுக் கருங்கலம் நமச்சிவாயவே. ---------(2)

விண்ணுற அடுக்கிய விறகின் வெவ்வழல்

உண்ணிய புகிலவை ஒன்றுமில்லையாம்

பண்ணிய உலகினில் பயின்ற பாவத்தை

நண்ணி நின்றறுப்பது நமச்சிவாயவே. ---------(3)

இடுக்கண் பட்டிருக்கினும் இரந்தி யாரையும்

விடுக்கிற் பிரானென்று வினவுவோமல்லோம்

அடுக்கற் கீழ்கிடக் கினுமருளின் நாம் உற்ற

நடுக்கத்தைக் கெடுப்பது நவச்சிவாயவே. ---------(4)

வெந்தநீ றருங்கலம் விரதிகட் கெலாம்

அந்தணர்க் கருங்கலம் அருமறை ஆறங்கம்

திங்களுக் கருங்கலம் திகழும் நீண்முடி

நங்களுக் கருங்கலம் நமச்சிவாயவே. ----------(5)

சலமிலன் சங்கரன் சார்ந்த வர்க்கலால்

நலமிலன் நாடொறும் நல்குவான் நலன்

குலமிலராகிலும் குலத்துக் கேற்பதோர்

நலமிகக் கொடுப்பது நமச்சிவாயவே. --------- (6)

வீடினார் உலகினில் விழுமிய தொண்டர்கள்

கூடினார் அந்நெறி கூடிச் சென்றலும்

ஓடினேன் ஓடிச் சென்று ருவங்காண்டலும்

நாடினேன் நாடிற்று நமச்சிவாயவே. --------------(7)

இல்லக விளக்கது இருள் கெடுப்பது

சொல்லக விளக்கது சோதியுள்ளது

பல்லக விளக்கது பலரும் காண்பது

நல்லக விளக்கது நமச்சிவாயவே. -------------(8)

முன்னேறியாகிய முதல்வன் முக்கணன்

தன்னேறியே சரணாதல் திண்ணமே அன்னேறியே

சென்றங் கடைந்தவர்க் கெல்லாம்

நன்னெறியாவது நமச்சிவாயவே.  ----------------(9)

மாப்பிணை தழுவிய மாதொர் பாகத்தான்

பூப்பிணை திருந்தடி பொருந்தக் கைதொழ

நாப்பிணை தழுவிய நமச்சிவாயப் பத்து

ஏத்த வல்லார் தமக்கு இடுக்கண் இல்லையே.-------(10)

(திருநாவுக்கரசர் அருளிய நமச்சிவாயத் திருப்பதிகம் முற்றிற்று)

திருச்சிற்றம்பலம்.

பாடல்களின் பொருள்:

வேதங்களின் சொற்களை அருளியவன் அதற்குத் துணையானவன்; ஒளி வடிவானவன்; பொன் போன்ற திருவடியை நாம் கைகூப்பி தொழ, கல்லுடன் சேர்த்து கட்டி, கடலில் நம்மை தள்ளினாலும், நமக்கு நல்ல துணையாக வந்து காப்பது சிவனின் திருநாமமான நமச்சிவாயவே! --(1)

பூக்களுக்கு ஆபரணம் விரிந்த தாமரை மலர்; பசுக்களுக்கு ஆபரணம் சிவனின் வழிபாட்டுக்குறிய பஞ்சகவ்வியம்; அரசனுக்கு ஆபரணம் வளையாத செங்கோல் ஆட்சி; நமது நாக்குக்கு ஆபரணம் சிவபெருமானின் திருநாமமான நமச்சிவாயவே! --(2)

விண்ணை முட்டும் அளவு விறகுக் கட்டைகளை அடுக்கி இருந்தாலும், ஒரு தீப்பொறி பட்டால், அவையெல்லாம் சாம்பலாகிவிடும்; இந்த உலகில் நாம் செய்த எல்லாப் பாவங்களையும் சுட்டெரிக்கும் திருநாமம் நமச்சிவாயவே! --(3)

எப்படிப்பட்ட இடுக்கண் என்னும் துன்பம் வந்தாலும், என்னை விடுவிக்கும்படி நான் யாரிடமும் சென்று கெஞ்ச மாட்டேன்; மலையின் அடியில் மாட்டிக் கொண்டாலும், எனக்கு நடுக்கமே வராது; என் சிவபெருமான் நாமம் நமச்சிவாயவே துணை இருக்கும்போது! --(4)

விரதத்தை மேற்கொண்டவர்களுக்குவெந்தநீறு என்னும் திருநீறு அருங்கலமாகும்; நான்மறை ஓதுவது அந்தர்க்கு அருங்கலமாகும்: திங்கள் என்னும் சந்திரனுக்கு சிவனின் நீண்ட முடியில் அமர்வது அருங்கலமாகும்; எங்களுக்கு சிவனின் நாமமான நமச்சிவாயமே அருங்கலமாகும்! --(5)

சலனமில்லாத சங்கரன் என்னும் சிவன் தன்னை சார்ந்த அடியவர்களுக்கு நன்மை செய்வான்; மற்றவர்களுக்கு நன்மை அளிக்க மாட்டான்';நற்குலத்தில் பிறக்காதவரும், சிவனின் நமச்சிவாய நாமத்தை சொன்னால் அவன் நன்மை அடையலாம்! --(6)

வீடுபேறு என்னும் முக்தியை அடைய, இந்த உலக பற்றுக்களை விட்டு விடுபட்டு, சிவனை பற்றி சிந்தித்தனர்; நானும் அப்படியே சிவனின் நமச்சிவாய என்னும் நாமத்தை பற்றிக் கொண்டேன்; எனக்கு அவன் அருள் கிடைத்தது;--(7)

வீட்டில் உள்ள விளக்கு இருளைப் போக்கும்; நம் அகமான உட்புறத்தை தெளிவிப்பது சிவனின் சோதியாகும்; பல சமயத்தையும் விளக்குவது பலரும் காட்டியது; இவைகளில் நல்ல விளக்காவது சிவனின் நமச்சிவாய என்ற நாமமே! --(8)

எல்லாவற்றுக்கும் முதன்முதல் ஆனவன் முக்கணன் ஆகிய சிவபெருமான்; அவன் காட்டிய வழியை அடைவதே சிறப்பு; அந்த நெறியே வீடுபேற்றை அடைய வழிகாட்டும்; அந்த நன்னெறியாவது சிவனின் நமச்சிவாயமே!--(9)

மாப்பிணை (மானை) தழுவிக் கொண்டு, தன் இடப்பாகத்தில் உமையாளை தனது உடலின் ஒருபாகமாக ஏற்றுக் கொண்டவன் சிவன்; அவனின் பூப்போன்ற திருவடியை மலர் தூவி வழிபட்டு, நம் நாவில் அவனின் நாமமான நமச்சிவாயத்தை புகழ்ந்து பாடினால் இடுக்கண் என்னும் துன்பம் நம்மை நெருக்காது;--(10)

                         திருச்சிற்றம்பலம்!

**